رجعت كندا و الحال كله متلخبط ، لا أنا عارف أنا حعمل إيه ولا عارف الدنيا حتوديني علي فين ،مخنوق مش عارف أتحرك لا يمين ولا شمال... الدنيا ضلمه ، الكام سنه الأواخر في الدراسه ظلمت نفسي أني بعدت عن الله و سبحانه و الدنيا و متعها خدت الواحد و ظلمت غيري بجهلي و قله خبرتي .

ربنا وعد البعيد عن ذكره سبحانه بمعيشه ضنكا … زمان كنت فاكر أن المعيشه الضنك هي قله المال و الفقر بس عرفت أنها مش بتتقاس كده ...بمقاييس الدنيا كنت أملك كل سبل الرفاهيه ...عايش في مكان يمينه جنه و شماله جنه بمعني الكلمه ..عايش مرتاح متمتع بصحتي ..لكن القلب تعبان مقبوض و موجوع و الروح مخنوقه .. عيشتي كانت ضنك بمعني الكلمه ...تعلمت أني عمري ما أحكم علي بشر بمظهره الخارجي ربنا وحده أعلم بي ألي في قلبه .

- أنا كنت عارف أن ده بسبب الذنوب و البعد عن الله …لأني عارف كويس الراحة النفسيه الواحد بيلاقيها لما بيقرب من الله سبحانه و تعالي ...أحساس كده مستحيل يوصف ..لازم تحسه ... الذنوب مش لازم تكون كبائر لكن حاجات كالتقصير في الصلاه … الأعراض عن ذكر الله … التقصير في حقوق الله سبحانه و تعالي ...كنت عارف الداء و لازمت الدواء ..

لازمت الاستغفار مده طويله جدا بنيه صلاح الحال .… كل حاجه بالتعود و التكرار بتصبح عاده...مش نظام دروشه و انقطاع عن الدنيا .. في شغلي في الأتوبيس خلاص بقت عادة ... بحس بشيء ناقص لو بطلت ... كل ما أحس أني بكسل أقرأ عن فضل الاستغفار ..مش بس مغفره و صلاح الحال .ده .مال .. بنون ..جنات و أنهار … أنا ألي شفته في حياتي عارف و متأكد أن ذلك ليس علي الله بعسير ...بشر نفسي أكيد في الدنيا لكن بصدق أنا كنت فعلا نيتي أن الله سبحانه و تعالي يرض عني و يغفر لي تقصيري في حق نفسي و حق من ظلمته ...و عدة الأيام !

يوم من الأيام والدتي كانت رايحه تزور أختي علي أطراف المدينه … ركبت الأتوبيس و كان زحمه ...جنب والدتي كان فيه كرسي فاضي … الكنديين ممكن جدا يفضلوا واقفين و يسيبوا الكرسي لحد محتاجه … ركبت من أحد المحطات بنت مصريه … أمي شافتها بحجابهأ و قالتلها تعلي اقعدي جنبي يا بنتي … أتبادلوا الحوار و البنت نزلت مع والدتي في نفس المحطه ...البنت كانت جايه كندا جديد بتدرس ماجستير و ساكنه مع عمتها علي بعيد بيتين من بيت أختي ...كلها كانت صدف غريبه جدا .

والدتي رجعت البيت و بتتكلم شعر عن البنت الي قابلتها … أنا عارف أمي صعب تقتنع بشخص بالطريقه دي بسهوله … أستغربت جدا لكن قلت لعل الله سبحانه و تعالي رايد خير و استجاب دعائي … أنا صحيح لا أملك ولا مليم لكن كأن عندي أحساس غريب أن ربنا حييسر الأمور و قد كان …أ تقدمنا و ربنا كرمنا باهل طيبين جدا سهلوا عينا كل حاجه وربنا كرمني بزوجه صالحه الحمد لله ... أنا مش عارف حتي الآن أزاي الموضوع مشي بالسلاسله دي غير أنه ترتيب الله سبحانه و تعالي … كل ده عادي و بيحصل !!!

لكن الغريب العجيب أني بعد كده لما تزوجت زوجتي الحبيبه عرفت أنها اليوم ده لما خلصت الدارسة دخلت المحطه عشان تركب الأتوبيس تروح البيت و أثناء انتظارها للأتوبيس افتكرت أنها محتاجه حاجه للبيت و سابت المحطه و راحت جابت الحاجة ألي ناقصه من السوبر ماركت و كان عدي أتوبيس و أتنين و ركبت الأتوبيس التالت ألي فيه أمي !!!...أقلب الموضوع يمين شمال مش لاقي تفسير للصدفه دي إلا أنها ثمره من ثمار الاستغفار ألي الله سبحانه و تعالي وعد بيها ... أن الله لا يخلف الميعاد أبدا …مش ممكن !

-طول عمري نفسي أحكي الحكايه ده و غيرها لعلها تكون صدقه جاريه للواحد .. أخاف الله سبحانه و تعالي يحاسبني أني عرفت طريق خير و ما دلتش عليه مسلم ممكن جدا يكون محتاج لقصه زي ده .... لكن أنا عمري ما حكيت الحكايه دي بالشكل ده لأن كل ألي حيجي في بال الي حيقرئ الكلام ده أن الكاتب ولي من أولياء الصالحين ..لكن الحقيقه أني أبعد ما يكون عن الالتزام ..و الله بلا تواضع كاذب أنا بعافر عشان أودي الصلاة المفروضه في وقتها ….مقصر في كل حاجه و ربنا عارف ... دعواتكم بالهدأيه ..القصه فعلا مش كده لكن الموضوع أن الله سبحانه و تعالي لا يخلف ألميعاد أبدا مهما طال الزمن … نعمه خير ليس كمثله خير و الله

فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّاراً (10) يُرْسِلِ السَّمَاء عَلَيْكُم مِّدْرَاراً (11) وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَاراً (12) مَّا لَكُمْ لَا تَرْجُونَ لِلَّهِ وَقَاراً (13) وَقَدْ خَلَقَكُمْ أَطْوَاراً (14)

My Facebook page 

https://www.facebook.com/mohamed.adam.33